காங்கிரஸிற்கு தமிழ் நாட்டில் மறுவாழ்வு!

விசித்திரமாகவும், பைத்தியக் காரத் தனமாகவும் தோன்றலாம். கிட்டதட்ட புதைக்கப் பட்ட கட்சி தமிழ் நாட்டில் உயிர்த்தெழுவதா என்ற கேள்வியும் எழலாம். கொஞ்சம் நிதானமாக யோசித்துப் பாருங்கள்.

அதிமுக வின் தலைவி திரு ஜெயலலிதா அவர்கள் மரணமடைந்த உடன் அந்த கட்சியின் / தமிழகத்தின் வெற்றிடம் பிரம்மாண்டமாக தெரிகிறது. ஜெயலலிதாவின் ஆளுமை அப்படிப் பட்டது. எம்ஜியாரும் கருணாநிதியும் அடைய முடியாத உயரம் இது.  (வெற்றிடம் பற்றி சென்ற வருடம் நான் எழுதியது)

இப்போது நடராஜன் அவர்களின் சித்து வேலைகளால் கிட்டதட்ட எல்லோரும் சசிகலாவின் பின் ஓரணியில் திரண்டு வருகிறார்கள். இங்கு எல்லோரும் என்பது அறியப்பட்ட / அறியப்படாத அதிமுக 'தலைவர்கள்' மற்றும் மீடியா 'நண்பர்கள்'

ஆனால், மக்களில் பெரும்பாலோருக்கு சசிகலா என்றால் வேப்பங்காய் என்பது உள்ளங்கை நெல்லிக்கனி. மக்களின் பொதுவான கருத்து ஜெயலலிதா நல்லவர்தான், ஆனால் சசிகலா தான் எல்லா கெட்டவற்றிக்கும் காரணம் என்பது. யோசித்துப் பாருங்கள். எவருக்காகவாது 10000 பேர் மொட்டை போட்டுக் கொண்டதாக சரித்திரம் உண்டா? எம்ஜியாருக்குக் கூட கிடையாது.

பிஜேபியை பொறுத்தவரை அவர்கள் சசிகலா பின்னால். கௌதமியை அறிக்கைவிட வைத்து சசிகலாவுக்கு ஒரு செக். சேகர் ரெட்டியை ரெய்டு செய்து பன்னீர் செல்வத்துக்கு ஒரு செக். சசிகலா தலைவியாக இருப்பதே பிஜேபி க்கு நல்லது என நினைக்கிறார்கள்.

திமுகவை பொறுத்தவரை, எது செய்தாலும் அவர்களுக்கு கெட்டப் பெயர். அதனால் அமைதியாக இருப்பது மட்டுமே அவர்களுக்கான ஆப்ஷன்.

  இது தான் காங்கிரஸிற்கு சரியான சந்தர்ப்பம். திருநாவுக்கரசர் தலைவராக இருப்பது காங்கிரஸிற்கு பெரிய அதிர்ஷ்டம். நேரடியாக எதுவும் செய்ய வேண்டாம்.

ஜெயலலிதாவின் சகோதரர் மகளை தலைவியாகக் கொண்டு அம்மா திமுக ஆரம்பித்தால், மிக விரைவில் கட்சியும் ஆட்சியையும் அதற்கு வந்துவிடும். அவரை முன்னிறுத்தி காங்கிரஸ் தன்னை பலப் படுத்திக் கொள்ளவேண்டியதுதான்!

ஒரு 10000 கோடி இருந்தால் இதைத்தான் நான் செய்வேன்! இல்லையே!

மேதைக்கு அஞ்சலி!

சிதார் மேதை ரவி ஷங்கர் அவர்களின் மறைவு மிகவும் வருத்தியது. அவர் தன் வாழ்நாளை இசைக்காகவே அற்பணித்திருப்பது அவர் வாழ்க்கை குறிப்பை படித்ததில் தெரிந்தது.  சில விஷயங்கள் தெரிந்திருந்தாலும் எப்போது படித்தாலும் பிரமிப்பை தருகிறது 

• உலகப்புகழ் பெற்ற உதய் ஷங்கர் இவர் அண்ணா 
• இவர் பள்ளியில் படித்தது மொத்தம் நான்கு வருடங்களே 
• உலகப்புகழ் பெற்ற சரோத் மேதை அலி அக்பர் கான் இவர் மனைவியின் சகோதரர் 
• சாரே ஜகான்சே அச்சா பாடல் இவர் அமைத்த மேட்டிலே தான் இன்னும் பாடப்படுகிறது 
• காந்தி படத்திற்கு இசை அமைப்பாளர் இவரே. அதற்க்கு ஆஸ்கர் நாமினேஷன் பெற்றார் 
• இசைக்கு வழங்கப்படும் கிராமி அவார்டை இவர் மூன்று முறை பெற்றிருக்கிறார் 
• நம் நாட்டின் உயர்ந்த விருதான பாரத் ரத்னா பெற்றதோடு, பிரான்ஸின்  உயர்ந்த விருதையும் பிரிட்டனின் சர் பட்டமும் பெற்றவர் இவர் 
• மூன்று புத்தகங்கள் எழுதியிருக்கிறார் 
• முப்பத்தொன்று புதிய ராகங்களை அறிமுகப்படுத்தியிருக்கிறார். 
• கர்நாடக இசையின் நுணுக்கங்களை இந்துஸ்தானி இசையில்  பயன் படுத்தியிருக்கிறார் 
• இவர் மகள்கள் இருவரும் பலமுறை கிராமி வென்றிருக்கிறார்கள் 
• உலகப்புகழ் பெற்ற இசை மேதை யெஹுதி மேனுஹினுடன் சேர்ந்து வாசித்த ஈஸ்ட் மீட்ஸ் வேஸ்ட் மிகவும் புகழ் பெற்ற ஒன்று 

நான் நெகிழ்ந்த மற்றொரு விஷயம்.. இவர் கடைசி கச்சேரி இந்த வருடம்  நவம்பர் நான்காம் தேதி நடந்தது. மறக்காதீர்கள். அவருக்கு வயது 92! மேடைக்கு வர சக்கர நாற்காலி தேவையாக இருந்தது அவருக்கு. அது மட்டும் இல்லை. கையோடு எடுத்து செல்லும் வகையில் சிறிய ஆக்சிஜன் சிலிண்டர் உதவியுடன் சுவாசிக்க முடிந்தது. இருந்தும் அரங்கத்தில் இருந்த அனைவரும் பிரமிக்கும் வகையில், அவர் இசைக்கு வயதே தெரியவில்லை என்றும் பலரும் புகழும் வகையில் அவர் இசை அன்று இருந்தது.

இவர் புவியில் இருந்தபோது நானும் வாழ்ந்தேன் என்பது  எனக்கு பெருமை!

ஸ்டீவ் ஜாப்ஸ் காலமானார்!

இந்த நூற்றாண்டின் இணையற்ற சி இ ஓ, ஸ்டீவ் ஜாப்ஸ் இன்று காலமானார். அழுகும் நிலையிலிருந்த ஆப்பிளை எல்லோரும் அண்ணாந்து பார்க்க வைத்த அவருக்கு என் அஞ்சலி..